İyül 14-te Kiyevde Qırım Muhtar Cumhuriyeti Yuqarı Radasınıñ sabıq deputatıı Vasiliy Ganışnıñ işi boyunca mahkeme toplaşuvına daa eki şaat çağırıldı, bu, Qırım parlamentiniñ sabıq deputatı Sergey Zayats ve ATR mühbiri Şevket Namatullayev. Bu aqta Qırım.Aqiqat mühbiri bildire.
Mahkeme sabıq deputat Sergey Zayatsnı daa keçken toplaşuvda çağırdı, amma belli olmağan sebeplerden o kelmedi. Qırım sabıq deputatı Ukrainanıñ qıtaiy qısmında bulunğanı aqqında belli ve evel onıñ devletke hiyanet etkeni aqqında şeklenüv ilân etilgen.
ATR mühbiri Namatullayev mahkemege prokuraturanıñ tevsiyesinen çağırıldı, çünki o, Ganış bulunğan rusiyeli Qırım parlamentiniñ toplaşuvından video süjetiniñ müellifi ola. Bu levha iyün 14-te mahkeme toplaşuvında taqdim etildi. Video süjet kösterilgen soñ, qabaatlanğan Vasiliy Ganış ve onıñ adliyecisi bu videonıñ doğru olğanından şübelengenlerini bildirdi.
Vasiliy Ganış işi boyunca nevbetteki toplaşuv Kiyevdeki Dnepr rayon mahkemesinde avgust 3-te keçirilecektir.
Vasiliy Ganış 2015 senesi aprel 28-de Ukraina havfsızlıq hızmeti ve Ukraina Devlet sıñır hızmeti tarafından Qırım çıqışında yaqalandı. Ganış apiske alındı, çünki onı qıdıra ediler. Baş prokuratura onı devlet hainliginde şeklendi.
Ukraina taqiqatçılarınıñ malümatına köre, Ganış Qırım statusı aqqında «referendum» keçirilmesine rey bergenlerden biri edi, ve böyle etip Ukraina topraq bütünligine zarar ketirmege tırıştı. Bunen beraber, siyasetçi 2014 senesi aprel 11-de rusiyeli Qırım parlamentiniñ toplaşuvında rusiyeli Qırım anayasası qabul etilmesine rey bergeninde qabaatlana.
Sabıq deputat ise bildire ki, o Qırım parlamentiniñ zalında «referendum» keçirilmesine qarşı rey bergen yekâne insan edi. Onıñ fikrince, devlet hainliginde qabaatlav delilsizdir.
