Link açıqlığı

«Fevral 26 işi» boyunca azırlıq diñlemesi iyül 20-de qapalı şekilde keçirilecek


Kremlge boysunğan Qırım prokuraturası qoşma taqiqattan soñ yarımada Yuqarı mahkemesine 2014 senesi fevral ayında Qırım parlamenti yanıda yüz bergen kütleviy nizamsızlıq aqqında cinaiy işni teslim etti. Bu aqta TASS agentligi, mahkemeniñ resmiy temsilcisine esaslanıp, bildire.

«İş mahkemege teslim etildi, azırlıq diñlemesi iyül 20-ge belgilendi, o, qapalı şekilde keçirilecek», – dep ayttı agentlikke intervyu bergen subetdeş.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahküm etmege başladılar.

«Memorial» uquq qoruyıcı merkezi Rusiyede «Fevral 26 işi» boyunca qabaatlanıp apiste bulunğan Ahtem Çiygoz, Ali Asanov ve Mustafa Degermencini siyasiy mabus olaraq tanıdı.

2016 senesi fevral ayında Rusiyege boysunğan Qırım Yuqarı mahkemesiniñ toplaşuvında bu işni qoşma taqiqatqa yollamaq qararı alındı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG