Link açıqlığı

İlmi Umerov oña qarşı açılğan cinaiy işke şikâyet etti ve psihiatrik ekspertizanı red etti


İşğal etilgen Qırımda «separatizmde» qabaatlanğan Qırımtatar Milliy Meclisi reisiniñ muavini İlmi Umerov Kremlge boysunğan Aqmescitteki Kiyev rayon mahkemesine mayıs 12-de cinaiy iş açılması aqqında qararğa qarşı şikâyetni berdi. Bu aqta İlmi Umerov Facebook saifesinde yazdı.

İlmi Umerov
İlmi Umerov

Bundan da ğayrı, onıñ sözlerine binaen, o, FSB taqiqatçısı adına ambulatoriyada mahkeme-psihiatrik ekspertizadan öz isteginen keçmege red etkeni aqqında arizanı berdi, bunı şahısnı itibardan tüşürme ve iş adı-sanını aşalama ıntıluvı olaraq körgenini bildirdi.

«Nevbetteki adımlar aqqında olarnıñ ömürge keçirilmesinen haber etecem. Yerli adliyeciler moskvalı adliyecilernen sıq çalışa. Ögünde radikal vazife qoydılar – cinaiy iş açılmasını qanunsız tanımaq. Amma, aytayım ki, «adalet» aqqında hayal etmeyim, 2014 senesi mart 16-da keçirilgen referendumnı ve onıñ aqibetlerini qanunsız sayam, Rusiyeniñ topraq bütünligine (Qırımsız, çünki bu Ukraina dep adlandırılğan diger devletniñ territoriyası) iddia etmedim», – dep aytıla beyanatta.

Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.

Mayıs 19-da Qırımtatar Milliy Meclisiniñ reis muavini İlmi Umerovğa rusiyeli Federal havfsızlıq hızmetiniñ Qırım idaresinde sorğudan soñ qabaatlavnı taqdim ettiler.

Mayıs 12-de onıñ evinde tintüv keçirildi, Rusiye FSB-niñ Qırım idaresiniñ taqiqatçısı oña çıqmamaq şartını bildirgen vesiqanı berdi. Bundan soñ taqiqatçılar İlmi Umerovnı iş malümatını faş etmemesi aqqında imza qoymağa mecbur ettiler. Sorğuğa onıñ apayı ve balaları da çekilgen edi.

Rusiyeli adliyeci Mark Feygin «Memorial» uquq qoruyıcı merkezine İlmi Umerovğa siyasiy taqip etilgen statusınıñ berilmesini rica etti.

XS
SM
MD
LG