Keriç «Zaliv» gemi qurğan işhanesine rusiyeli bücetten modernizatsiya ve sanayı quvetlerniñ yañıdan tehnikiy silâlanma boyunca leyhanıñ ömürge keçirilmesi içün subsidiya berile bile. Rusiyege boysunğan Qırım parlamenti yolbaşçısınıñ birinci muavini Konstantin Baharevniñ bildirgenine köre, yardım 38 million rubleni teşkil etecek.
«2016 senesi subsidiya miqdarı 38 million rubleni teşkil etecek, modernizatsiyanıñ keçirilmesi ise, işhaneniñ aman-aman bütün qısımlarında planlaştırıla: kögerte işlemesi tsehlerinde, qaynaq ve boyacı tsehlerinde, quru dokta», – dep bildire yarımada parlamentiniñ matbuat hızmeti.
Baharevniñ sözlerine binaen, işhaneniñ esas fondlarınıñ modernizatsiyası, onıñ kelecekte inkişaf etmesi içün esas şartlardan biri ola.
Subsidiyanıñ 2015-2017 seneleri işğal etilgen Qırımnıñ sanayı kompleksiniñ inkişafı boyunca devlet programması çerçivesinde berilmesi planlaştırıla, oña sekiz Qırım müessisesi kirsetilgen.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
