İnternette ağğa bağlanmanı şifr etmege ve er angi saytqa anonim olaraq kirmege imkân bergen Private Internet Access ecnebiy VPN-servisi Rusiyeden «Yarovaya paketi» içün kete, dep bildire Radio Svoboda.
Şirketniñ beyanatında bildirile ki, Rusiyede onıñ serverlerinden bazıları yaqında ükümet tarafından, evelden haber etilmeyip ve uquqtan vazgeçip, alındı. Şirketniñ işandırğanına köre, ükümetke müşterilerniñ malümatlarına irişim berilmedi.
Rusiye Devlet Duması deputatı İrina Yarovaya ve Federatsiya Şurası azası Viktor Ozerov tarafından işlep çıqarılğan, antiterroristik qanunlarını qaviyleştirgen qanunlar paketi iyül 7-de prezident Putin tarafından imzalandı. Qanunlarnıñ biri ağ operatorlarını yarım yıl devamında müşterilerniñ yazışmaları ve laflarını, bunen beraber, üç yıl devamında bağlamalar aqqında malümatnı saqlap tutmağa mecbur ete.
Ağ operatorları bir qaç sefer qayd etken edi ki, qanunnıñ ömürge keçirilmesi şirket tarafından büyük masraflarnı talap etecek, bu sebepten ise, hızmetler fiyatları köterilecek.
Qanunlar poçta ağları operatorlarını, yollanmalarda silâ, patlatıcı maddeler ve diger yasaq etilgen madde ve eşyalarnıñ yoq olmasında emin olmaq içün, rentgen-televizion ve radioskop aletlerini, maden detektorları ve diger aletlerni qullanmağa mecbur ete.
