Link açıqlığı

«SimSitiTrans» adliyecileri Qırımda işhaneniñ blok etilmesine qarşı şikâyet etti – İslâmov


Lenur İslâmov

Qırımda «SimSitiTrans» naqliye şirketiniñ adliyecileri Kremlge boysunğan Aqmescit Merkeziy okrugınıñ arbitraj mahkemesine şirket faaliyetiniñ toqtatılması aqqında qararğa qarşı kassatsiya şikâyetini teslim etti.

Bu aqta iyül 13-te Qırım.Aqiqatqa Qırım qamaçavı aktsiyasınıñ lideri Lenur İslâmov bildirdi, bu naqliye şirketiniñ faaliyetini onen bağlaylar.

Bunen beraber, İslâmovnıñ fikrince, bu mahkemeniñ müsbet qararını beklemek kerekmey.

«Balalar evel de şikâyet bergen edi, olarnıñ fikrince, bu kereklidir. Amma men bundan fayda olacağına inanmayım. Ükümet (Kremlge boysunğan Qırım ükümeti – QA) qanunsızdır, olarnen mahkemeleşme ıntıluvlarınen biz olarnıñ qanuniy olğanını tasdıqlaycaqmız», – dep qayd etti İslâmov.

İyün ayınıñ soñunda Qırımda «SimSitiTrans» şirketiniñ faaliyeti blok etildi. Kremlge boysunğan Aqmescit memuriyetiniñ matbuat hızmetinde bildirgenlerine köre, memurlar «işbu taşıcınıñ şeer marşrutlarında deñiştirilmesi» boyunca faaliyet alıp bardı.

Soñki 14 yıl devamında ilk sefer şirket avtobusları şeer ve şeerlerara marşrutlarına çıqmadı, dep ilân etti «SimSitiTrans» şirketiniñ müdiri Edem İslâmov. Onıñ sözlerine binaen, faaliyet seneleri devamında şirket 127 million yolcunı taşıp berdi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG