Bütün Rusiyeden 1100-den ziyade talebe 2016 senesi iyün-oktâbr ayları devamında Qırım bağçalarında meyva cıyacaq, dep bildire Kremlge boysunğan Qırım tasil nazirligi. Böyleliknen Qırımda bütün Rusiye talebe köy hocalığı leyhası başlandı, dep bildireler müessisede.
«Bu, tatilde çalışmağa alışqan talebelerge özleri içün Qırımnı açmaq, onıñ tarihı ve medeniyetinen tanış olmaq içün pek yahşı bir imkândır», – dep bildire nazirlikniñ matbuat hızmeti.
Leyha «Rusiye talebe taqımları» yaşlar cemaat teşkilâtı tarafından ömürge keçirile. İyünden avgust ayına qadar Petrovka ve Orehovo köylerinde 450 talebe, avgusttan oktâbr ayına qadar daa 650 talebe meyva cıyacaq. İşni «Qırım meyva şirketi» işhanesi taqdim etecek, dep qayd ettiler Qırım nazirliginde.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
