Link açıqlığı

Uquq qoruyıcı: «terroristler cedvelinden» Qırım sakinleriniñ soyları FSB-nıñ nezareti astında


Rusiyeli «terroristler cedveline» tüşken Qırım sakinleriniñ soy-sopları ve yaqınları endi rusiyeli mahsus hızmetlerniñ nezareti astında buluna, dep tüşüne Qırım uquq qoruyıcı gruppasınıñ idarecisi Olga Skripnik.

Bu aqta o, Qırım.Aqiqatqa bergen izaatında añlattı.

«Elbet, bu insanlarğa («terroristler cedvelinden» – QA) nisbeten nasıldır tedbirler alıp barıla, bu cümleden, telefonlar diñlenile. Bunıñ içün, eñ azdan, bu adamlarnen qonuşqan er kes ve bu cedvelge tüşken insanlar añlamaq kerek ki, antiekstremistik ve antiterroristik faaliyet çerçivesinde olarnıñ telefonları diñlenile», – dep ayttı Skripnik.

«Belki, olarnıñ elektron poçtaları bozulması içün bazı faaliyet alıp barıla. Bu yerde kompyuter, İT-havfsızlıq tarafından pek muqayt olmaq kerek» – dep qayd etti o.

Rusiye maliye nezaret etüv boyunca Federal hızmetiniñ resmiy saytında işğal etilgen Qırımnıñ eñ azdan 20 sakini kirsetilgen terrorist ve ekstremistler cedveli yerleştirildi. Olarnıñ arasında Qırım mühbiri Mıkola Semena da oldı, onı rusiyeli mahsus hızmetler «separatizmde» qabaatlay. Bundan evel jurnalist Qırım.Aqiqatqa bu cedvel peyda olğan soñ onı tiygen sıñırlamalar aqqında bildirdi.

Uquq qoruyıcılarnıñ fikrince, Qırım sakinlerini tek Rusiyege halqara basım vastasınen «terroristler cedvelinden» çıqarmaq mümkün.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG