Qırımtatarlar ve ukrainler Rusiye tarafından işğal etilgen Qırımda qarşılıqnı devam ete, dep bildirdi Ukraina haber siyaseti naziriniñ birinci muavini Emine Ceppar iyül 12-de keçirilgen «Krım.Sprotiv» («Qırım.Qarşılıq») vesiqalı-bediiy filminiñ premyerasında.
«Film, Ukrainanıñ Qırımda imayesi, yarımadada qırımtatarlar ve ukrainler aqqındadır, olar işğalci içün esas nişan oldı, amma qarşılığını devam ete – kimse apishanede, kimse azatlıqta, kimse işğal etilgen Qırımda, kimse qıtada», – dep qayd etti o.
İyül 12-de Kiyevde Ukraina Haber siyaseti nazirligi 2014 senesi Rusiye tarafından Qırım işğaline bağışlanğan «Krım.Sprotiv» («Qırım.Qarşılıq») vesiqalı-bediiy filmini taqdim etti.
Premyerada Ukraina prezidenti Petro Poroşenko, qırımtatarlarnıñ liderleri, cemaat erbapları, ATO askerleri, yırcı Jamala bulundılar.
Film taqdiminde Petro Poroşenkonıñ ilân etti ki, bundan evel olğan ukrain ükümeti qırımtatarlarnıñ öz-özüni idare etüv aqqınıñ esasında milliy-territorial muhtariyet ğayesini ömürge keçirse edi, Qırımnen bağlı vaziyet «başqa olur edi».
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
