Link açıqlığı

Qırım mekteplerinde yarımada tarihını rusiyeli neşriyat dersliklerinden ögrenecekler


İşğal etilgen Qırımnıñ talebeleri yañı oquv yılında Rusiyeden dersliklerni alacaq, kitaplarda yarımada tarihı, bu cümleden, Qırım işğaliniñ rusiyeli variantı tafsilâtlıca añlatıla.

Rusiyeli «Prosveşeniye» neşriyatınıñ malümatına köre, mektep talebeleri ve tarih ocaları 7000-den ziyade Rusiye tarıhı boyunca yañı derslik ve qullanmalarnı alacaq.

«Tafsilâtlıca Qırım tarihı añlatıla, bu cümleden böyle mevzular aydınlatıla: Şimaliy Qara deñiz yalısı (Priçernomorye); Qırım ve Ruste hristianlıqnıñ başlanması; Qırım hanlığı ve onıñ hususiyetleri ve inkişaf devirleri; Qırımnıñ Rusiye imperiyasına qoşulması; Qırım cenki ve Aqyar mudafaası; Ulu Vatan cenki seneleri Aqyar qaramanlı mudafaası ve Qırımnıñ faşist işğalinden azat etilmesi; 2014 s. Qırımnıñ Rusiye ile yañıdan birleşüvi ve digerleri», – dep ayttı «Prosveşeniye» neşriyatınıñ içtimaiy maarif merkeziniñ müdiri Aleksandr Danilov.

Neşriyatta qayd etkenlerine köre, yaqın vaqıtta yarımadada Qırım pedagogları içün seminarlar teşkil etilecek. Bildirilgenine köre, tarih ocaları içün seminarlar 2016 senesi avgust-dekabr aylarında keçirilecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG