Link açıqlığı

Siyasiy mabuslarnıñ taqdirine lâqayt qalmaq – cemaat kelecek kütleviy basqılarğa izin bere demektir. Rusiyedeki siyasiy mabuslarnıñ sayısı toqtamayıp arta, faqat cemaat ve demokratik kütleviy haber vastaları kün-künden olarğa daa az diqqat ayıralar. Artıq siyasiy mabusnıñ ükmü seslendirilgende mahkemege yüz kişi kelse, bu büyük bir muvafaqiyet sayıla.

Yañı insanlarnı apiske aldırğan «Bolotnaya işi» daa bir qaç yıl sürecektir. Al-azırda sekiz kişi apiste yata. Mahkemeler muntazam sürette keçirile, ve yalıñız bir qaç insan qoltutmağa kele. İçtimaiy ağlarda bir şey paylaşqan insanlar sıq-sıq apiske alına. Bir kişilik narazılıq aktsiyası içün vatandaş faali İldar Dadin apiste yata. Ceza kodeksinde bir sıra yañı «cinayet» peyda oldı, artıq er bir insannı ve aman-aman er angi narazılıq faaliyeti içün apishanege atmaq mümkün.

Ebet, uquq qorçalayıcı teşkilâtlar bar, misal olaraq, «6 mayıs komiteti» ya da «Siyasiy mabuslar ile birdemlik birligi». «Bolotnaya işiniñ» sabıq mabusı Vladimir Akimenkov siyasiy mabuslarnı qorçalamaq içün para toplay. Amma para çoq kelmey, siyasiy mabuslarnıñ çoqusınıñ masrafları qarşılanmay, bazıları bu yardımnı iç körmeyler.

Putinniñ sisteması bir işaret köstere – razı olmağanlarnı urmaq mümkün, ceza yoq!

Akimiyet televizor teşviqatını qullanıp, tarafdarlarını razı olmağan, tenqit etken ve bunı açıq-aydın bildirgenlerden nefret etmege mecbur ete. Az qaldı, muhalifetni «Milliy qurtulış areketi» degil, Dmitriy Kiselevni ve Vladimir Solovyevni gece-kündüz seyir etken içkige toymağan erkekler kötekleycek. Olarğa bir şey olmaz, amma olardan zarar körgenler ceza ala bile. Men aman-aman aynı vaziyetke oğrağan edim, Severnoye Medvedkovo rayonında meni bir qaç adam kötekledi, amma olar degil, cinaiy mesüliyetke menim çekildim. Akimiyet bundan fayda köre, çünki men muhalifetten deputat namzetini köstergen edim ve şimdiki rejimniñ yapqanlarını añlatqan risaleler tarqatqan edim. Böylece, Putinniñ sisteması bir işaret köstere – razı olmağanlarnı urmaq mümkün, ceza yoq!

Qapularıñıznı qırıp, «Vkontakte» içtimaiy ağında qaldırğan tefsiriñiz içün tintüv keçirilmegen olsa, muhalifet saifesine abune olğanıñız içün soqaqta daa köteklenmegen olsañız, – areket etiñiz. Uquq qorçalayıcı teşkilâtta göñülli olmaq mümkün, olarğa para bermek mümkün. Jurnalistler – siyasiy mabuslar aqqında maqale yazsın, siyasetçiler – kün tertibinde bu mevzudan vazgeçmesin. İçtimaiy ağlarda siyasiy mabuslar aqqında malümatnı paylaşıñız, yarım yılda bir kere işten izin alıp, mahkemege keliñiz. Er angi şekilde iştirak ete bilesiñiz. Eñ esası – bu mevzunı körip köz yummamaq. Bugün yanımızda olmayıp, kirli ve dar apishanede yatqanlar içün mesüliyetli olmalımız.

Bunı borc sayıp yazam, amma kene de añlayım, bu metnge diqqat ayıracaq kişi çoq olmaz: boldurıp devam eterler. Bu mevzuda akimiyet qazandı – siyasiy işler cemaatnı meraqlandırmağan adiy şeylerge çevirildi.

Nikolay Kavkazskiy, Moskvadaki «Molodejnoye Yabloko» teşkilâtınıñ reisi, «Yabloko» firqasınıñ ve Sol sotsialist areketiniñ azası

«Bloglar» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışlarınen aynı olmaması mümkün

Maqaleniñ özü – Radio Svoboda saytında

XS
SM
MD
LG