Link açıqlığı

Ufa sakinleri «Qırım bizimki. İmkânsız şey yoq» avto yürüşi ile Qırımğa yol ala


«Qırım bizimki. İmkânsız şey yoq» adlı avto yürüş tünevin, iyül 11-de rusiyeli Ufa şeerinde başlandı. Bu aqta «Başkortostan» DTRK bildire.

Qayd etilgenine köre, avto yürüş «yarımada sakinlerine qol tutmaq içün» teşkil etildi. İştirakçilerniñ sözlerine binaen, merasim «em nesillerniñ, em de bütün devletniñ birdemligi timsali» olmalı.

İştirakçilerni beş kilometrden ziyade yol bekley. Avto yürüş marşrutı Volgograd, Keriç, Aqyar, Qarasuvbazardan keçecek, seerniñ er birinde «vatanperver şou» teşkil etilecek, dep aytıla beyanatta.

«Ulu Vatan cenki vaqtında olğan ava uruşınıñ tarihiy rekonstruktsiyasını köstrecek uçucılar, er aqşam bu şeerlerniñ er birinde taqdim etilecek ğalebe fişenki – bularnıñ episini dostlar yapa. Bundan bir kapık qazanmaymız. Bu, şeerlerniñ sakinlerine ediyedir, veteranlarımızğa minnetdarlıqtır», – dep ilân etti leyha idarecisi Aynur Galâutdinov.

Avto yürüş Rus coğrafik cemiyetiniñ regional bölügi ve Başkortostan Cumhuriyeti DOSAAF-ı tarafından teşkil etildi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG