Link açıqlığı

Qırımda taşınmaz mallarnıñ qayd etilmesi aqqında şeadetnamelerniñ berilmesi toqtatıla


İyül 15-te işğal etilgen Qırımda taşınmaz mallarğa mülkiyet aqqınıñ devlet qayd etilmesi aqqında şeadetnamelerniñ berilmesi toqtatıla. Bu aqta Devlet qayd etilmesi ve kadastr boyunca Qırım komitetiniñ matbuat hızmetinde bildirdiler.

Komitet yolbaşçısı Aleksandr Spiridonovnıñ ilân etkenine köre, rusiyeli 122 sanlı qanunnıñ deñişmeleri işke tüşürilgen soñ, taşınmaz mallarnıñ devlet qayd etilmesi tek Taşınmaz mallarğa aqlarnıñ ve onen añlaşmalar yekâne devlet cedvelinden yazma boyunca tasdıqlana.

«2016 senesi iyül 15-ke qadar berilgen mülkiyet aqlarınıñ qayd etilmesi aqqında kâğıt şeadetnamelerni Taşınmaz mallarğa aqlarnıñ ve onen añlaşmalar yekâne devlet cedvelinden yazmağa deñiştirmeniñ keregi yoq. Şeadetnameler endi kerekmey. Yañı usulnıñ esas maqsadı dolandırıcılıqnıñ ögüni almaq ve qayd etilgen aqlarnıñ kefaletini qaviyleştirmektir», – dep añlattı Spiridonov.

Müessisede qayd etilgenine binaen, cedvelden yazma devlet qayd etilmesini ve cedvelde onda qayd etilgen malümatnıñ bar olğanını, bu cümleden aq saibi ve aq belgilegen vesiqalarnıñ bar olğanını tasdıqlay.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG