Rusiyeli muhalif, Aleksey Navalnıynıñ safdaşı ve «İnternet qorçalama cemiyeti» reisi Leonid Volkov Moskva belediyesine iyül 26-da «terrorizmge qarşı» qanunlarğa, böyle adlandırılğan «Yarovaya paketine» qarşı mitingniñ keçirilmesi aqqında beyanatnı berdi.
Volkovnıñ öz saytında yazğanına köre, merasimniñ esas maqsadı «Anayasanıñ 23 ve 24-ci maddelerini saqlanmaq içün, internet-tsenzura ve internet-taqipqa qarşı, Rusiyede internet serbestligi içün mitingniñ» keçirilmesidir. Tahminlerge köre, aktsiyada eki biñ insan iştirak etecek. Merasimniñ Slavânkaya meydanında keçirilmesi planlaştırıla.
Facebookta körüşüv saifesinde qayd etilgenine binaen, aktsiyalar Rusiyeniñ diger şeerlerinde de keçirile bile.
Rusiye prezidenti Vladimir Putin «terrorizmge qarşı paketini» iyül 7-de imzaladı. Deñişmeler paketi «çaqmama» ve kütleviy nizamsızlıqta iştirak etmesine «yaqınlaşma» içün cinaiy mesüliyetniñ kirsetilmesini belgiley. Bağ operatorları endi müşterilerniñ bütün telefon laflarını ve mesajlarını yazmaq ve saqlamaq mecbur.
