Link açıqlığı

Saatnıñ esas haberi

Çubarov: Qırımdan tış yerli ükümet beyanatları qabul etilmey


Kremlge boysunğan Qırım ükümeti temsilcileri tarafından imzalanğan beyanatlar tek yarımada sakinleri içün yapıla. Böyle fikirni Qırım.Aqiqat Radiosınıñ saba yayınında Qırımtatar Milliy Meclisi reisi Refat Çubarov, Kremlge boysunğan Qırım parlamentiniñ Qırımtatar Milliy Meclisini ekstremizm ve terrorizmde qabaatlağan beyanatına izaat berip, bildirdi.

«Esas alıcı, bu Qırım sakinleridir. Rusiye tarafından işğal etilgen Qırımdan tış iç kimse Qırımdaki ükümet tarafından qabul etilgen vesiqalarğa emiyet bermey», – dedi o.

Refat Çubarovnıñ fikrince, Moskvağa boysunğan Qırım ükümeti bu kibi beyanatlar vastasınen «duşmanlarnı» tayinlemege ve yarımada sakinleriniñ diqqatını içtimaiy problemalardan almağa tırışa.

«Ealini daima nasıldır usulnen kerginlikte tutmaq kerek. Demek ki, bu ealige kelecekte de Qırım parlamentinde oturıp qalğan hainlerge Qırımda yahşı ömür şaraitini qurmağa bermegen duşmanlarnı, qarşı olğanlarnı daa ziyade kösterecekler. Olar duşmanlarnı qıdıra ve duşmanlarnı köstere. Şimdiki vaqıtta bu qırımtatarlar, Qırımtatar Milliy Meclisidir», – dep qayd etti o.

İyül 8-de Kremlge boysunğan Qırım parlamentiniñ saytında «yarımada sakinlerine qarşı yapılğan ekstremizm ve terrorizmni» takbih etken beyanat yerleştirildi. Terroristik faaliyetniñ teşkil etilmesi içün Qırımtatar Milliy Meclisi qabaatlandı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG