Rusiye tarafından işğal etilgen Qırımda qorqalar ki, yarımadadaki çoq aerodromı baqımsız qalacaq. Bu aqta 2016-2020 seneleri Qırımda vatandaş aviatsiyası inkişafı boyunca «yol haritası» merasimleri planınıñ ömürge keçirilmesi meseleleri boyunca toplaşuvda söz yürsetildi. Bu aqta Kremlge boysunğan yarımada ükümetiniñ matbuat hızmeti bildire.
«Qırım territoriyasında çoq aerodrom bar. Uçaq alanları – bu pek çoq maliye talap etken infrastruktura inşaatlarıdır, ve olarnıñ baqımsız qalmasını istemez edik», – dep ayttı toplaşuv devamında Ava naqliyesi Federal agentliginiñ reisi Aleksandr Neradko.
O, Qırımda Ulyanovsk vatandaş aviatsiyası institutınıñ filialını teşkil etmege teklif etti.
Moskva tarafından tayinlengen yarımada yolbaşçısı Sergey Aksönov, Qırım uçucılarnıñ azırlanılması boyunca vazifelerni, bu cümleden, Rusiye Federatsiyası Sanayı nazirligi ve Mudafaa nazirligi qoyğan vazifelerni becereceginden emin olğanını bildirdi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
