Link açıqlığı

Türkiyede mahkeme İstanbulnıñ baş ava limanında yüz bergen patlavlarnen bağlı olğanında şeklenilgen daa 7 kişini yaqaladı. Türkiyeli kütleviy haber vastalarınıñ bildirgenine köre, endi yaqalanğan kişilerniñ sayısı 37-ni teşkil etti.

Anadolu devlet agentliginiñ iyül 11-de haber etkenine köre, şeklenilgen insanlar «silâlı terroristik taqımınıñ azaları olğanlarında» ve öldürüvde iştirak etkenlerinde qabaatlanıp yaqalandı.

«Dogan» şahsiy haber agentligi bildire ki, olarnıñ episi iyül 10-da aqşam yaqalandı, yaqalanğanlar ecnebiy vatandaşlar ola.

İstanbul ava limanına ücüm iyün 28-de yüz berdi. Patlavlar neticesinde eñ azdan 45 insan, bu cümleden, Ukraina vatandaşı, elâk oldı, tahminen 240 kişi yaralandı.

Vaqia içün mesuliyetni kimse boynuna almadı. Lâkin, Türkiye prezidenti Recep Tayyip Erdoğan bildirdi ki, ücüm sabıq Sovet birligi devletlerinden olğan «İslâm devleti» silâlı taqımları tarafından yapıldı.

Türkiye kütleviy haber vastaları Türkiye ükümetindeki adını bildirmegen menbanıñ malümatını bildirgen edi, o, ücümler Rusiye, Özbekistan ve Qırğızistan vatandaşları tarafından yapılğanını ilân etken edi.

Özbekistanda bu beyanatlarğa izaat bermediler. Türkiyede Rusiye elçisi Andrey Karlov, ücümlernen Rusiye vatandaşları bağlı olğanı aqqında onıñ malümatı yoq olğanını ilân etken. Qırğızistanda İstanbulda ava limanına ücüm etkenler arasında bu devletniñ vatandaşları olğanı aqqında beyanatqa cevap olaraq, ücüm etkenlerniñ ekisi Rusiye vatandaşları olğanını ayttı.

XS
SM
MD
LG