Soñki eki yıl içinde süküt Qırım sakinleri içün «yaşama strategiyası» oldı. Böyle fikirni Qırım.Aqiqat Radiosınıñ saba yayınında psihoterapevt Svetlana Panina bildirdi.
Onıñ sözlerine köre, yarımada sakinleri problemalarnı muzakere etmege qorqa, «Yarovaya paketinden» deñişme qanunı buna yardım ete.
«Er angi söz içün ekstremizmde qabaatlap yaqalamaq, er angi süküt içün ise, çaqmamada qabaatlanıp yaqalamaq mümkün olğan qanun leyhaları... Adamlar qaysı yılğa tüşkenini añlamağa tırışa: otuz yedincimi, yoqmı. Bunıñ içün, er ihtimalğa qarşı, bir şey yazmaylar. Qırımda bu pek yahşı duyula, çünki o yerde em ükümet, em qanunlar, em de neler mümkün, neler mümkün olmağanınen bağlı meselelerde añlaşılmamazlıqtır», – dep ayttı Svetlana Panina.
Geştalt-terapevt Anastasiya Hromovanıñ fikrince, Qırım sakinlerine süküt problemalardan qaçınmağa yardım ete.
«Alisa mücize dünyasında»da aytılğanını hatırlaysıñızmı: «Bu yerde bir sözniñ fiyatı ne olğanını bilesiñizmi?». Ve sen onıñ ola bilecek fiyatını, neler ola bilecegini bilmeseñ, indememek daa yahşıdır. Bu ömrüñni saqlağan şeydir», – dep ayttı Hromova.
Rusiye prezidenti Vladimir Putin «terrorizmge qarşı paketini» iyül 7-de imzaladı. Deñişmeler paketi «çaqmama» ve kütleviy nizamsızlıqta iştirak etmesine «yaqınlaşma» içün cinaiy mesüliyetniñ kirsetilmesini belgiley. Bağ operatorları endi müşterilerniñ bütün telefon laflarını ve mesajlarını yazmaq ve saqlamaq mecbur.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
