Keriç parom keçitinde, yolcularnıñ sayısı çoq olğanı sebebinden, yaqın künlerde elektron bileti olmadan bu yerde keçmege tevsiye etmeyler. Bu aqta malümat parom keçitiniñ resmiy taşıcısı olğan «Deñiz müdirligi» resmiy saytında bildirile.
«Seçkeniñiz tarihqa elektron biletler olmasa, ziyaretiñizni diger künge keçirmege tevsiye etemiz. Keçitke elektron bileti olmadan kelgende paromğa minme çoq vaqıt alacaq», – dep aytıla beyanatta.
Bildirilgen malümatqa binaen, keçken afta soñu Keriç parom keçitinden 71 biñden ziyade insan ve tahminen 18 biñ avtomobil keçti.
Keriç boğazında parom keçiti Qırımnı Rusiye Federatsiyasınıñ Krasnodar ülkesinen bağlağan esas naqliye yolu ola.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
