Link açıqlığı

Rusiyede Türkiyege turlarnıñ satılması bir afta içinde eki qat azlaştı – kütleviy haber vastaları


Türkiyenen çarter ava seferleri olmağanı sebebinden Rusiyede bu devletke ziyaretlerge istek eksildi. Rusiyeli «Kommersant» bildirgen malümatına köre, satış tek bir afta devamında yüksek seviyede oldı, bundan soñ azlaştı.

Bildirilgenine köre, Türkiyege turlarnıñ satılması tahminen eki qat azlaştı. Rusiyeli internet resursları istekniñ 45%-dan 25%-ğa qadar eksilgenini qayd ete. «Yandex.Seyahatlar»da Türkiyege turlarnıñ satılması 25%-dan 10-ğa qadar tüşkenini qayd eteler, bu ise, Qırım içün köstergiçke yaqındır – 9,7 fayız.

Bundan evel Türkiyedeki yañı raatlıq fiyatları rusiyelilerni şaşırttı. Evel Antalya kurortlarına 30 biñ rubleden barıp kelmek mümkün edi, şimdi ise Türkiyede raatlanmaq içün rusiyelilerge 100 biñ ruble ve ziyade kerek olacaq.

İyün 30-da Rusiye prezidenti Vladimir Putin Türkiyege turlarnıñ satılmasına sıñırlanmanı red etti. Bunen beraber, Rusiye ve Türkiye arasında çarter ava seferlerine yasaq lâğu etildi.

Rusiye ve Türkiye prezidentleri Vladimir Putin ve Recep Tayip Erdoğan iyün 29-da telefon lafı çerçivesinde turizm saasında işbirlik yañıdan tiklemesi ve ticariy-iqtisadiy munasebetlerniñ eyileştirilmesi başlaması aqqında añlaştılar.

Kremlniñ qayd etkenine köre, bu, Erdoğan 2015 senesi noyabr ayında elâk olğan uçucınıñ qorantasından afu sorağanı ve taziye bildirgeninden soñ mümkün oldı. O vaqıt Türkiye arbiy ava quvetleri Türkiye ve Süriye arasındaki sıñır yanında rusiyeli Su-24 cenk uçağını urdı.

O vaqıt Moskva Ankarağa qarşı sanktsiyalar kirsetti.

XS
SM
MD
LG