Türkiyege turlarnıñ satılması ve çarter ava seferlerine sıñırlanmanıñ lâğu etilmesi işğal etilgen Qırımğa turistik aqınına pek tesir etmez. Böyle fikirni Rusiyege boysunğan yarımada parlamentiniñ komiteti reisi Aleksey Çernâk bildirdi.
«Eñ evelâ, Qırım kurortları, turistlerniñ havfsızlığını kimse kefil etmegen Türkiye, Mısır ya da avropalı memleketlerge baqqanda, raatlıq içün daa havfsızdır. O yerde yüz bergen teraktlar bunı tasdıqlay. Kimseniñ, ömür telükesi bar olğan şübeli raatlıq içün, Qırımğa alğan putövkadan vazgeçeceginden şübelenem», – ayttı Çernâk, dep bildire müessiseniñ matbuat hızmeti.
Rusiye ve Türkiye prezidentleri Vladimir Putin ve Recep Tayip Erdoğan iyün 29-da telefon lafı çerçivesinde turizm saasında işbirlik yañıdan tiklemesi ve ticariy-iqtisadiy munasebetlerniñ eyileştirilmesi başlaması aqqında añlaştılar.
Kremlniñ qayd etkenine köre, bu, Erdoğan 2015 senesi noyabr ayında elâk olğan uçucınıñ qorantasından afu sorağanı ve taziye bildirgeninden soñ mümkün oldı. O vaqıt Türkiye arbiy ava quvetleri Türkiye ve Süriye arasındaki sıñır yanında rusiyeli Su-24 cenk uçağını urdı. Bundan soñ Moskva Ankarağa qarşı sanktsiyalar kirsetti.
Turistik yollamalar yañıdan satılıp başlağan soñ üç kün devamında Türkiye rusiyeliler arasında eñ populâr yöneliş oldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
