Link açıqlığı

Saatnıñ esas haberi

Qırımtatar liderleri Varşavada Poloniya prezidenti ile körüşmege planlaştıra


Qırımtatar milliy lideri, Qırımtatar halqı meseleleri boyunca Ukraina prezidentiniñ vekâletlisi Mustafa Cemilev ve Meclis reisi Refat Çubarov bu afta Varşavağa yol alacaq, o yerde Poloniya prezidenti Ancey Duda ile körüşecek olalar.

Bu aqta Cemilevniñ matbuat hızmeti bildire.

Elde etilgen malümatqa binaen, Poloniya prezidenti ile körüşüv iyül 6-da, çarşenbe künü keçirilecek. Körüşüv çerçivesinde muzakere etilecek mevzular bildirilmey.

İyül 7 ve 8 künleri Ukraina halq deputatları Çubarov ve Cemilev Poloniya paytahtında NATO Varşava sammitiniñ Ekspert forumında iştirak etecek, dep bildireler matbuat hızmetinde.

Aprel ayında Varşavağa Ukraina prezidenti Petro Poroşenko iş ziyareti ile kelgen edi. O, Poloniya Cumhuriyeti prezidenti Ancey Duda ile körüşüv keçirdi. Prezidentler Qırımnıñ işğalden azat etilmesi boyunca Ukrainanıñ teşebbüsini muzakere etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG