Link açıqlığı

Rusiyege boysunğan Aqyar gubernatorı Sergey Menâylo emin ki, rusiyeli turistler içün Türkiye yönelişi açılğanına baqmadan, raatlanıcılar ep bir Qırımğa kelecek. Onıñ fikrince, şimdiki vaqıtta Türkiyedeki vaziyet çoqusını qorquza.

Bu aqta o, mühbirlernen körüşüvde ilân etti, dep bildire şeerniñ rusiyeli akimiyetiniñ matbuat hızmeti.

«Er raatlanıcı istiqrar olğan yerge kete. Türkiyedeki vaziyet raatlanıcılarnı qorquza. Elbet, o yerde hızmetler seviyesi bayağı yüksekçe. İklimiy şarait bu yerde mükemmeldir. Raatlanıcılar Qırımnı tek raatlanmaq içün degil de, amma yarımadanıñ itibarğa lâyıq yerlerinen tanış olmaq içün de saylay. Aqyar kurort bir şeeri degil, amma bu yerdeki er taş tarihtır. Biz berilgen hızmetler ve infrastruktura seviyesini avropalı seviyege ketirmek kerekmiz», – dedi o.

İyün soñunda Rusiye prezidenti Vladimir Putin Türkiyege turlarnıñ satılmasına sıñırlanmanı red etti. Bunen beraber, Rusiye ve Türkiye arasında çarter ava seferlerine yasaq lâğu etildi.

Rusiye ve Türkiye prezidentleri Vladimir Putin ve Recep Tayip Erdoğan iyün 29-da telefon lafı çerçivesinde turizm saasında işbirlik yañıdan tiklemesi ve ticariy-iqtisadiy munasebetlerniñ eyileştirilmesi başlaması aqqında añlaştılar.

Kremlniñ qayd etkenine köre, bu, Erdoğan 2015 senesi noyabr ayında elâk olğan uçucınıñ qorantasından afu sorağanı ve taziye bildirgeninden soñ mümkün oldı. O vaqıt Türkiye arbiy ava quvetleri Türkiye ve Süriye arasındaki sıñır yanında rusiyeli Su-24 cenk uçağını urdı.

O vaqıt Moskva Ankarağa qarşı sanktsiyalar kirsetti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG