Rusiye Köy hocalığı siyaseti nazirliginiñ yolbaşçısı Aleksandr Tkaçev işğal etilgen Qırımda sığırlarnıñ berimliligini arttırmaq kerekligini qayd etti. Bu aqta o, iyül 8-de Aqmescitte keçirilgen toplaşuvda bildirdi.
Nazirlik beyanatında bildirilgen malümatqa köre, Tkaçevniñ sözlerine binaen, bu sene Qırımda köy hocalığı istisalcıları keçken sene olğan süt istisalınıñ eksilüvini toqtatıp oldı, o vaqıt süt istisalı 15%-ğa 240 biñ tonna qadar eksildi.
Derc etilgen malümatqa binaen, 2016 senesi 1-ci üç ay devamında süt istisalı 6%-ğa arttı, sığırlarnıñ sayısı üçte birge arttı ve 6 biñ sığırnı teşkil etti. Müessisede bunı Qırımda yañı süt fermasınıñ işke tüşürilmesinen bağlaylar.
«Regionda sığırlarnıñ berimliligini arttırmaq kerek. Keçken sene neticelerine köre, 2015 senesi devamında 1 sığırdan sağılğan sütniñ miqdarı 10%-ğa eksildi, ve 3,7 biñ kilogrammnı teşkil etti. Bu raqamnı eñ azdan eki qat ziyadeleştirmek kerek ve süt sağmasını 6-7 biñ kilogrammğa qadar arttırmaq kerek», – dep qayd etti rusiyeli nazir.
Qırımda bulunıp, rusiyeli nazir bildirdi ki, Qırım agrosanayı kompleksine Rusiye Federal bücetinden ayırılğan devlet destegi miqdarı bu sene, 2015 senesine köre, beş qat ve, 2014 senesine köre, on qat arttı.
2015 senesi sentâbr ayında Qırımnıñ mahsulat qamaçavı boyunca aktsiyası başlağan soñ, yarımadağa resmiy olaraq ukrain mahsulatınıñ ketirilmesi toqtatıldı. Tükânlarda aşayt malları qıtlaştı, birazdan soñ «Krımmoloko» («Qırımsüt») işhanesi qapatıldı, o qomşu Herson vilayetinden ketirilgen maddelerinen çalışa edi. Adamlar Rusiyeden ketirilgen süt mahsulatınıñ keyfiyetine şikâyet etmege başladı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
