Link açıqlığı

Aqmescitte Rusiyege boysunğan ükümet «idare etilgen tarif ile muntazam taşıma teşkil etilmesi boyunca icracınıñ belgilenmesi» meselesi boyunca toplaşuv keçirdi. Bu aqta şeerniñ rusiyeli akimiyetiniñ matbuat hızmeti bildire.

«Naqliye ve bağ idaresi müdiri Aleksey Sahno muntazam taşıma saasında bugünki vaziyet aqqında malümat bildirdi, bunen beraber, olğan problemalarnıñ çezilmesinen bağlı tekliflerni taqdim etti», – dep aytıla beyanatta.

İyül 8-de, cuma künü mahkeme temsilcileri «Trans-Tur» naqliye şirketiniñ faaliyetini toqtattı. Bundan evel Qırımnıñ eñ büyük naqliye şirketi olğan «SimSitiTrans» işhanesiniñ litsenziyası toqtatıldı, onı Qırım qamaçavı aktsiyasınıñ lideri Lenur İslâmovnen bağlaylar. Mahkeme qararınen naqliye taşıcısı mülküni mahkeme temsilcileriniñ Federal hızmeti hadimleri müürledi. İyün 29-da avtobuslar marşrutlarğa çıqmadı, olarnıñ yerine diger avtobuslar işke tüşürildi.

Ameldeki şeer yolbaşçısı Gennadiy Baharev naqliye taşıması meselesi eñ yaqın vaqıtta çezilecegini vade etken edi ve şeer sakinlerini buña «añlap» davranmağa çağırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG