Ukraina prezidenti Petro Poroşenko Varşavada NATO sammitinde iştirak etmek içün iş ziyareti çerçivesinde Türkiye Cumhutiyeti prezidenti Recep Tayyip Erdoğan ile muzakereler keçirdi.
Ukrain prezidentiniñ matbuat hızmetiniñ bildirgenine köre, Türkiye prezidenti Ukraina mustaqilligine ve topraq bütünligine qol tutqanını bildirdi ve işğal etilgen Qırımda qırımtatarlarnıñ taqip etilmesini takbih etti.
Erdoğan qayd etti ki, ukrain-türkiyeli strategik işbirliginiñ qaviyleştirilmesine iç bir şey tesir etmez.
Poroşenko, öz tarafından, Türkiye halqına İstanbul ava limanında yüz bergen facia munasebetinen taziye bildirdi.
Prezidentler regional havfsızlıq ve devletler arasındaki iqtisadiy işbirlik faalleştirilmesi saasında nevbetteki adımlar aqqında añlaştı.
Bundan da ğayrı, Ukraina ve Türkiye prezidentleriniñ iştiraginen Yüksek seviyeli Strategik şurasınıñ nevbetteki toplaşuvınıñ Kiyevde keçirilmesi aqqında añlaştılar. Devletler yolbaşçıları tışqı işler nazirlerine onı azırlamağa avale etti.
İyül 8-de Varşavada NATO-nıñ eki kün devam etecek sammiti başlandı.
Tintüvler, hırsızlıq ve diger qırımtatarlarğa nisbeten yapılğan basqınlar Qırım işğal etilgen soñ bitmey. Bu aqta daimiy şekilde uquq qoruyıcılar, bu cümleden halqara uquq qoruyıcılar bildire. Lâkin, Kreml ve Rusiyege boysunğan Qırım ükümeti bunı red ete, ve er vaqıt «cinayetniñ milleti yoqtır» dep ilân ete.
