Link açıqlığı

Qırımtatar Milliy Meclisiniñ reisi Refat Çubarov Rusiyege boysunğan Qırım parlamentiniñ iyül 8-de ilân etken beyanatına izaat berip, oña «işğalci ükümetiniñ panika keyfiniñ keñleşmesi» olaraq qıymet kesti.

«Eki yıl evel öz devletini, halqını satqan, halqara uquqnı körmemezlikke urğan, Qırımnı ve onıñ sakinlerini iqtisadiy qarışıqlıqqa ve yoqsullıqqa ketirgen şahıslar olarıñ tarafından yapılğan cinayetler içün ayrı-ayrı mesuliyetke celp etileceklerini añlay», – dep yazdı Çubarov Facebook saifesinde.

Onıñ fikrince, rusiyeli Qırım parlamentiniñ mecliske qarşı beyanatı «Qırım cemiyetiniñ ayatnıñ bütün saalarında felâketli yaramaylaşuvdan diqqatını bölmek» ıntıluvı ola.

İyül 8-de, cuma künü Rusiyege boysunğan Qırım deputatları dünyanı Qırımtatar Milliy Meclisine qol tutmamağa çağırdı ve bu teşkilâtnıñ telükeli olmasını qayd etti.

Aprel 26-da Rusiyege boysunğan Qırım Yuqarı mahkemesi Meclisniñ yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketini takbih etti.

Meclis imayesi Rusiye Yuqarı mahkemesine apellâtsiya şikâyetini yolladı, amma onıñ baqıluvı tarihı daa belgilenmedi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG