Rusiyeden Qırımğa Keriç boğazında köpür qurulmasınıñ umumiy fiyatı 227,92 milliard ruble teşkil etecek. Bu, 2015 senesi yanvar 30-da qabul etilgen Rusiye ükümetiniñ 118-p sanlı fermanınen belgilengen leyhanıñ ömürge keçirilmesi fiyatına köre, 380 million ruble (tahminen 6 million dollar) azcadır, dep bildire «Krımskiy most» («Qırım köprü») haber merkezi.
Yañı sayılğan fiyatqa «Stroygazmontaj» şirketiniñ leyhası icracısınıñ masrafları ve qurucılıq müşterisi «Taman» Federal yol agentliginiñ masrafları kire.
Elde etilgen malümatqa köre, Keriç boğazında köpür leyhası ve quruvına devlet kontraktınıñ umumiy fiyatı (icracınıñ masrafları) 223 142 621 480 ruble miqdarında belgilengen, bunen beraber NDS 18%.
«Köpür qurulmasına devlet kontraktından ğayrı, leyhanıñ ömürge keçirilmesi müşteriniñ qurucılıq nezareti içün masrafları, müellif nezareti, topraq damartılarınıñ satın alınması ve olarnıñ daimiy qullanuvı resmiyleştirilmesi, evelden körünmegen masraflarnı közde tuta», – dep aytıla beyanatta.
Keriç boğazından köpür qurulmasınıñ kerekligi aqqında Putin ta 2014 senesi, işğalden soñ aytqan edi.
Köpürni 2018 senesine qadar qurmağa, 2019 senesi yazda işke tüşürmege vade etken ediler.
Ukraina Rusiyenen Keriç köprüniñ qurulışı ile bağlı añlaşmadan 2014 senesi, Rusiye Qırımnı işğal etken soñ çıqtı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
