Link açıqlığı

Qırım işğalden azat etilmese, Rusiyege qarşı sanktsiyalar lâğu etilmez, dep işandırdı Kerri


Amerika Qoşma Ştatları devlet kâtibi Jon Kerri iyül 7-de Kiyevni ziyaret etip, Rusiyege qarşı sanktsiyalar Donbass boyunca Minsk añlaşmaları ömürge keçirilmeycegine qadar devam etecegini ilân etti. AQŞ-nıñ Rusiye tarafından işğal etilgen Qırım boyunca noqta-i nazarı aynı böyledir, dep ayttı Kerri.

Bu aqta Ukraina prezidentiniñ memuriyeti saytındaki beyanatta söz yürsetile.

Matbuat hızmetiniñ malümatına köre, Ukraina prezidenti Petro Poroşenko ve Jon Kerri Rusiyeniñ Ukrainağa qarşı basqıncılığı, Donbass ve Rusiye tarafından işğal etilgen Qırımdaki vaziyetnen bağlı meselelerni tafsilâtlıca muzakere ettiler.

Hususan, Jon Kerri qayd etti ki, onıñ devleti Ukraina şarqındaki vaziyetni nezaret astında tuta ve Minsk añlaşmalarınıñ tolusınen ömürge keçirilmesini talap ete: kerçekten de ateşniñ toqtatılması, OSCE-niñ Donbassnıñ bütün territoriyasına, bu cümleden, sıñırğa kirmesi içün sıñırsız izin, reinelerniñ azat etilmesi, bütün arbiy quvetlerniñ ve tehnikanıñ alıp çıqarılması.

«Eger Rusiye deeskalatsiya boyunca bütün mecburiyetlerini ömürge keçirmese, sanktsiyalar devam etecek. Aynı vaziyet Qırımnen bağlı», – dep qayd etti o.

Bunen beraber, Jon Kerri AQŞ Rusiye tarafından ukrain yarımadanıñ işğalini qabul etmegenini bir daa ayttı. Bundan da ğayrı, o, ukrain ükümetine Minsk añlaşmalarını ömürge keçirmek içün destek köstereceginde işandırdı, dep bildireler matbuat hızmetinde.

Petro Poroşenko AQŞ-nı Ukraina mustaqilligi, topraq bütünligi, bu cümleden Qırım meselesinde printsipial noqta-i nazarı içün teşekkür bildirdi.

AQŞ, Avropa Birligi ve diger Ğarp memleketleri 2014 senesi devamında Rusiyege qarşı sanktsiyalarnı kirsetti, birinciden, Qırım işğali içün, soñra da Moskvanıñ Donbasstaki davada rolü içün. Keçken sene Rusiye prezidenti Vladimir Putin bildirdi ki, sanktsiyalar Rusiyeniñ areketlerine ve qararlarına tesir etip olamaz.

Ukraina ve Ğarp memleketleri Rusiyeni Donbassta separatistlerge qol tutqanı içün qabaatlay. Moskva bu qabaatlavlarnı red ete, ve Donbassta rusiyeli askerler yoq olğanını, amma o yerde «göñülliler» bar olğanını ayta.

Avropa Birligi bu yazda Rusiyege qarşı iqtisadiy sanktsiyalarnıñ müddetini daa yarım yılğa, 2017 senesi yanvar 31-ge qadar uzattırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG