Rusiye Tışqı işler nazirliginiñ resmiy temsilcisi Mariya Zaharova işğal etilgen Qırımda bulunıp, iyül 7-de mühbirler içün Rusiye tışqı siyasetinen bağlı aktual meseleler boyunca er afta teşkil etilgen brifing keçirdi.
Bu aqta rusiyeli nazirlikniñ matbuat hızmeti bildire.
Brifing «Artek» bala merkezinde keçirildi.
«Bu ayrı bir brifing, çünki o Qırım Cumhuriyetinde keçirile. Biz bu yerde «Artek» yolbaşçılığınıñ davetinen bulunamız», – dep ayttı Zaharova, ve bundan evel o, kün devamında lagerniñ bir otrâdında yetekçi olaraq bulunğanını bildirdi.
Brifingde Zaharova NATO ve Rusiye arasındaki munasebetler, Gürcistan ile viza rejiminiñ qolaylaştırılması, terrorizm telükesi, Ukraina ve Rusiye arasındaki munasebetler mevzularını muzakere etti.
Şimdiki vaqıtta Rusiye Tışqı işler nazirligi temsilcisiniñ Qırımğa ziyareti boyunca ukrain ükümetiniñ izaatı yoq.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
