Link açıqlığı

Qırımtatar liderleri Poloniya prezidentinen Qırımnıñ işğalden azat etilmesini muzakere ettiler


Varşavada qırımtatarlarnıñ lideri, Qırımtatar halqı meseleleri boyunca Ukraina prezidentiniñ vekâletlisi Mustafa Cemilev ve Meclis reisi Refat Çubarov Poloniya prezidenti Ancey Dudanen körüşti. Cemilevniñ matbuat hızmetiniñ bildirgenine köre, körüşüvde esasen Qırımnıñ işğal meselesi ve onıñ işğalden azat etilmesi muzakere etildi.

«Biz em prezidentke, em de poloniyalı Tışqı işler nazirligine olarnıñ noqta-i nazarımızğa, Ukraina noqta-i nazarına, hususan Qırım meselelerinde, tecavuzcığa qarşı sanktsiyalarnıñ uzattırılması meselelerinde destek köstergenleri içün minnetdarlıq bildirdik», – dep aytıla beyanatta.

Matbuat hızmetinde bildirdiler ki, meselelerden biri tasilnen bağlı edi.

«Gençlerimizniñ Poloniyada tasil alması imkânı muzakere etildi. Bu munaqaşalar İlim nazirliginde devam etecek, neticeler aqqında haber etilecek», – dep qayd ettiler müessisede.

Cemilev ve Çubarov Poloniyağa iyül 5-te yol aldı. İyül 7 ve 8 künleri olar NATO Varşava sammitiniñ Ekspert forumında iştirak etecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG