Link açıqlığı

Qırımda mahkeme «Hizb ut-Tahrir» işi boyunca yaqalanğanlarnıñ apiste bulunma müddetini oktâbr ortasına qadar uzattırdı


Aqmescitteki Kiyev rayon mahkemesi «Hizb ut-Tahrir» işi boyunca yaqalanğan Enver Mamutov, Rustem Abiltarov, Remzi Memetov, Zevri Abseitovnıñ apiste bulunma müddetini 2016 senesi oktâbr 11-ge qadar uzattırdı. Bu aqta «Qırım mabusları» gruppası Facebook saifesinde iyül 6-da, çarşenbe künü aqşam bildirdi.

«Mahkeme, beklenilgeni kibi, Enver Mamutov, Rustem Abiltarov, Remzi Memetov, Zevri Abseitovnıñ apiste bulunma müddetini 11.10.2016 qadar uzattırdı. (Hizb ut-Tahrir işi). Bugün mahkeme OMON-nıñ nezareti astında keçirile edi, bunen beraber, OMON hadimleri video çıqarğan edi», – dep aytıla beyanatta.

Enver Mamutov, Remzi Memetov, Zevri Abseitov ve Rustem Abiltarov mayıs 12-de Bağçasarayda yaqalandı.

Rusiyege boysunğan Qırım prokuraturası, yaqalanğanlar «Hizb ut-Tahrir» teşkilâtınen bağlı olğanını ayta.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti. Bu teşkilât Rusiye, Özbekistan, Qazahistan, Qıtay, Almaniya, Asiya ve Afrikanıñ bazı devletlerinde yasaq etildi. Ukraina ve Ğarp memleketleriniñ çoqusında onıñ faaliyeti qanun boyunca alıp barıla bile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG