Türkiye prezidenti Recep Tayyip Erdoğan sabıq sovet cumhuriyetleriniñ vatandaşları İstanbuldaki ava limanında yüz bergen patlavnen bağlı olğanını tasdıqladı.
«Afsus ki, teraktnen Şimaliy Qavqazdan qomşularımız bağlı», – dep ayttı Erdoğan.
Oraza bayramı munasebeti ile İstanbul camileriniñ birinde qılınğan namazdan soñ mühbirlerge intervyu bergen vaqtında Türkiye prezidenti bildirdi ki, Atatürk ava limanında yüz bergen patlavnen bağlı iş boyunca 30 kişi yaqalandı. Onıñ sözlerine köre, şeklenilgen insanlar arasında Dağıstan, Qırğızistan ve Tacikistan vatandaşları bar, dep bildire Hurriyet. Bundan evel kütleviy haber vastaları teraktnen bağlı bir ya da eki Rusiye vatandaşı, ve Qırğızistan sakini aqqında yazğan edi.
Bundan da ğayrı, Erdoğan ava limanında patlav «İslâm devleti» tarafından yapılğanını tasdıqladı.
İyün 30-da Reuters agentligi, türkiyeli ükümet temsilcisiniñ malümatına esaslanıp, bildirdi ki, Rusiye vatandaşı Atatürk adına ava limanında terakt yapqan özüni öldürgen kişiler arasında oldı.
İyül 1-de DHA türkiye agentligi özüni ava limanında patlatqan üç kişiden ekisiniñ Rusiye pasportları bar olğanını bildirdi. Biriniñ Rakim Bulgarov adına pasportı, digeriniñ ise, Vadim Osmanov adına pasportı bar edi.
İyün 28-de aqşam İstanbul ava limanında üç patlav yüz berdi. Türkiye ükümetiniñ malümatına binaen, patlavlar özüni öldürgen terroristler tarafından yapıldı. Üç terrorist terminal ziyaretçilerine ateş açtı, bundan soñ ava limanınıñ farqlı taraflarında özüni patlattı. Ücümniñ qurbanı 45 kişi oldı, bu cümleden, 13 ecnebiy vatandaş elâk oldı.
