Link açıqlığı

Aqyar civarındaki köy sakinleri Putinge Skype vastasınen yaramay yollar ve kiçik pensiyalarğa şikayet etti


Aqyar civarındaki Şüli (Ternovka) köyünde Rusiye prezidentiniñ memuriyeti azaları tarafından vatandaşlarnıñ Skype vastasınen video qabulı keçirile. Avtobusta kompyuter qoyulğan, evelden yazılğan sakinler bu yerge kirip, rusiyeli prezident memuriyeti azalarına suallerini bere bile.

Adamlar sorağan meseleler bozulayatqan bala bağçaları, yollar ve mektepler, sabıq sovhoz infrastrukturasınıñ yoq etilmesi, pensiyalarnıñ ufaq seviyesinen bağlı.

Sualler arasında etraftaki müit vaziyeti de oldı. Meselâ, köy sakinleri hladagent anbarınıñ qazaiy vaziyetinden qasevetlene, olarnıñ sözlerine köre, bu anbar Qırımda eñ büyük sayıla ve onıñ bozulması havflıdır.

Şüli köyüniñ faalleri Putinge üç suv obyektiniñ – köy yanında yerleşken göllerniñ, olarnıñ fikrince, reyder elge keçirüvini toqtatmaq muracaatınen bulundı.

Aqyardan kelgen alimler, cemaat teşkilâtları ve siyasiy firqalar temsilcileri Rusiye prezidenti memuriyetiniñ temsilcilerini qurulğan TES faaliyetiniñ alıp barılmasına yol bermemege çağırdı. Alimlerniñ fikrince, elektrik stantsiyasınıñ faaliyeti etraftaki müitke zarar ketirecek. Qurulğan TES yanındaki yüzüm bağı, alimlerniñ qayd etkenlerine köre, yoq olacaqtır.

Çoq insan rusiyeli prezident memuriyetiniñ hadimleri tarafından keçirilgenvatandaşlarnıñ video qabulına başlanğan saylavaldı kampaniyasınıñ bir qısmına olaraq baqa. Bu sene sentâbr ayında Rusiyede Devlet Dumasına saylavlar keçirilecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG