Link açıqlığı

Qırımtatar Qurultayı Merkeziy saylav komissiyasınıñ reisi Zair Smedlâyevniñ qayd etkenine köre, iyül 6-da, Qırım musulmanları büyük Oraza bayramını qayd etken vaqtında, yarımadada terrorizmge qarşı ögrenmeler keçirile.

Onıñ malümatına köre, hususan, böyle ögrenmeler şimdi Yedi Quyu rayonında keçirile.

«Qara Quyu (İlyiçovo) köyünde blokpostlar qoyuldı. Adamlar çıqıp, adet boyunca, yaqınlarını ve dostlarını bayramnen hayırlap olamay. Açuvlanğan sakinler soraylar ki, hristian bayramlarında da yaqınlarnı ziyaret etmege imkânsız yapacaqlarmı?» – dep yazdı o Facebook saifesinde.

Diger menbalarda, bu cümleden Rusiyege boysunğan Qırım resmiy uquq qoruyıcı müessiselerinde, ögrenüvlerniñ keçirilmesi aqqında malümat tasdıqlanmay.

Tünevin Ukraina ve işğal etilgen Qırım musulmanları muqaddes Ramazan ayınıñ yekünlenmesini, Oraza bayramını qayd etmege başladı. Yarımadada bu bayram raatlıq künü olaraq ilân etilgen.

Oraza bayramında musulmanlar bayram namazını qıla, eñ güzel urba kiye, milliy aşlar pişire, bayram sofralarını donata, musafirlerni qarşılay ve musafirlikke ediyelernen bara, quvana ve şenleneler. Bayram üç kün devam ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG