Ukraina Nazirler kabineti prezident fermanı leyhasını alğışladı ve fevral 26 künü Qırım sakinleriniñ rusiyeli basqıncılıqqa qarşılığı künü olaraq tasdıqladı.
Mütenasip qarar iyül 6-da, çarşenbe künü ukrain ükümetiniñ toplaşuvında qabul etildi.
Bu tarih, 2014 senesi fevral 26-da Qırım sakinleri Aqmescitte Qırım Muhtar Cumhuriyeti parlamenti yanında Ukraina topraq bütünligi içün miting keçirgeninen bağlı olıp belgilendi.
«Bu, işğal şaraitinde yaşağan, öz seviyesinde zorbalıqsız qarşılıq faaliyetini alıp barğan ukrainlernen birdemlikniñ büyük bir işaretidir», – dep qayd etti toplaşuvda Ukraina haber siyaseti naziriniñ birinci muavini Emine Ceppar.
Ukraina Yuqarı Radası fevral başında «2016 senesi hatıra künleri ve yubileylerni qayd etüv» qararını qabul etti. Oña binaen bu sene fevral 26 künü devlet seviyesinde qayd etildi.
Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
Qırım Muhtar Cumhuriyeti prokuraturası 2016 senesi mayıs 17-de Qırım parlamentiniñ yanında 2014 senesi fevral 26-da keçirilgen barışıq toplaşuvına mania olması boyunca cinaiy iş açtı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
