Ukraina prezidenti Petro Poroşenko musulmanlarnı üç kün devam etken Oraza bayramınen hayırladı. Bu sene bayram iyül 5-te başlandı.
Poroşenkonıñ qayd etkenine köre, bu bayramnıñ «teren diniy manası bar, o insannıñ eñ yahşı hususiyetlerini aça ve ahlâq tarafından yañılaşuvğa yol bere».
Bunen beraber, Petro Poroşenko ukrain halqınıñ birlik-beraberlik olıp, diniy ve milliy farqına baqmadan, beraber manialarnı yeñmege azır olğanını qayd etti.
«İnanam ki, Ukraina içün küreşte ğalebe qazanırmız ve tuvğan topraqqa çoq beklenilgen barışıq ve amanlıq kelir. Er keske sağlıq, quvanç ve muvafaqiyetler tileyim», – dep aytıla prezident memuriyetiniñ saytındaki beyanatta.
Bundan evel ukrain spikeri Andrey Parubiy iyül 5-te Yuqarı Radası toplaşuvında Ukraina musulmanlarını Oraza bayramınen hayırladı. Bundan da ğayrı, Kiyev şeer devlet memuriyetiniñ saytında Kiyev şeer yolbaşçısı Vitaliy Kliçkonıñ hayırlav sözleri yerleştirilgen.
Ukraina haber siyaseti naziri Yuriy Stets öz hayırlavında Ukrainada islâmnıñ esas merkezi, Qırım olğanı ve olacağını qayd etti. Qırımtatar Milliy Meclisi reisi Refat Çubarov Qırımnıñ işğalden azat etilmesi içün küreş muvafaqiyetli olmasını tiledi.
Tünevin Ukrainada ve işğal etilgen Qırımda musulmanlar Oraza bayramını qayd etmege başladı. Camilerde bayram namazı qılındı, çeşit bayram merasimleri keçirildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
