Fond Crimea bildire ki, Poloniyağa Rusiye tarafından işğal etilgen Qırımdan 49 bala raatlanmağa keldi.
«Bugün Qırımdan 49 bala Poloniyadaki Plonsk şeerine 14 künge keldi. Bu, UM. Płońsk, American Storm şirketi, poloniyalı «Qırım» Fundatsiyası»nıñ işbirliginde, Mustafa Cemilevniñ logistikası boyunca ve Lemişivka Agro plüs agroholdingniñ maliye desteginen yapılğan iştir. Biz olar içün pek yahşı keyfiyetli maarif-eglence programmasını azırlamağa tırıştıq», – dep aytıla beyanatta.
Poloniyalı «Qırım» Fundatsiyası»nıñ reisi Riza Asanov ola. Mayıs ayında fundatsiyanıñ teşebbüsi ile Poloniya paytahtı Varşavada ukrain ve qırımtatar bayraqlarınen vışıvanka paradı keçirildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
