Link açıqlığı

Qırımda mahkeme «Hizb ut-Tahrir» işi boyunca qabaatlanğan Mamutovnıñ apiste bulunma müddetiniñ uzattırılmasını baqacaq – adliyeci


Emil Kurbedinov

«Hizb ut-Tahrir» işi boyunca qabaatlanğanlardan biri olğan Enver Mamutovnıñ apiste bulunma müddetiniñ uzattırılmasını iyül 6-da Aqmescitteki Kiyev rayon mahkemesi baqacaq. Bu aqta adliyeci Emil Kurbedinov bildirdi.

«Enver Mamutovnıñ (Hizb ut-Tahrir işi, Bağçasaray) apiste bulunma müddetiniñ uzattırılması boyunca mahkeme bugün, 06.07.16 Aqmescitteki Kiyev rayon mahkemesinde saat 16.00-da keçirilecek», – dep yazdı adliyeci Facebook saifesinde.

Enver Mamutov ve daa üç kişi – Remzi Memetov, Zevri Abseitov ve Rustem Abiltarov mayıs 12-de Bağçasarayda yaqalandı.

Rusiyege boysunğan Qırım prokuraturası, yaqalanğanlar «Hizb ut-Tahrir» teşkilâtınen bağlı olğanını ayta.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti. Bu teşkilât Rusiye, Özbekistan, Qazahistan, Qıtay, Almaniya, Asiya ve Afrikanıñ bazı devletlerinde yasaq etildi. Ukraina ve Ğarp memleketleriniñ çoqusında onıñ faaliyeti qanun boyunca alıp barıla bile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG