Rusiye ve Türkiye arasındaki turistik yönelişniñ yañıdan açılması işğal etilgen Qırımda raatlıq fiyatlarına müsbet tesir ete bile. Böyle fikirni Rusiyege boysunğan yarımada parlamentiniñ sanitar-kurort kompleksi ve turizm boyunca komitetiniñ reisi Aleksey Çernâk bildirdi.
«Rusiyeli raatlanıcılarnı celp etmek içün, türkiyeli turistik saasında fiyatlar siyaseti yañıdan baqılacaqtır, putövka ve ava taşımasına fiyatlar eksilecektir. Eminim ki, bu, otelyerlerimiz, taşıcılarımız ve restoratorlarımız içün «ayınıqtırıcı duş» olacaqtır, çünki olar esassız fiyatlarnı köterdiler, özlerini monopolist duydılar. Kerçek raqiplik vaziyetinde Qırım kurortları berilgen hızmetlerniñ fiyatları ve keyfiyetiniñ nisbetini yañıdan baqıp çıqacaqtırlar», – ilân etti Çernâk, dep bildire Qırım parlamentiniñ matbuat hızmeti.
Deputatnıñ fikrince, rusiyelilerniñ Türkiyege raatlıqqa ketmeleri yarımadada kurort mevsimine tesir etmezdir. Çernâk emin ki, Rusiye ve Türkiye arasındaki turistik munasebetleriniñ tolusınen yañıdan tiklenilmesi içün, turoperatorlarnen añlaşmalarnıñ tizmesi, çarter seferleriniñ teşkil etilmesi içün daa tahminen eki ay kerek olacaqtır.
«Böyle etip, dep qayd ete Çernâk, Qırımda 2016 kurort mevsimine bu vaziyet tesir etip olamaz», – dep bildirdiler matbuat hızmetinde.
Rusiye ve Türkiye prezidentleri Vladimir Putin ve Recep Tayip Erdoğan iyün 29-da telefon lafı çerçivesinde turizm saasında işbirlik yañıdan tiklemesi ve ticariy-iqtisadiy munasebetlerniñ eyileştirilmesi başlaması aqqında añlaştılar.
Kremlniñ qayd etkenine köre, bu, Erdoğan 2015 senesi noyabr ayında elâk olğan uçucınıñ qorantasından afu sorağanı ve taziye bildirgeninden soñ mümkün oldı. O vaqıt Türkiye arbiy ava quvetleri Türkiye ve Süriye arasındaki sıñır yanında rusiyeli Su-24 cenk uçağını urdı. Bundan soñ Moskva Ankarağa qarşı sanktsiyalar kirsetti.
Turistik yollamalar yañıdan satılıp başlağan soñ üç kün devamında Türkiye rusiyeliler arasında eñ populâr yöneliş oldı.
