İyül 5-te musulmanlar qayd etken Oraza bayramı munasebetinen Qırım müftisi hacı Emirali Ablayev dindaşlarğa hutbe keçirip, barışıq ve insafqa çağırdı.
Qırım ve Sevastopol şeeri musulmanları diniy idaresi (QMDİ) matbuat hızmetiniñ bildirgenine köre, tahminen bir yarım biñ insan Aqmescitteki Zenaat birlikleri medeniyet sarayında Qırım musulmanlarınıñ diniy yetekçisi hacı Emirali Ablayev tarafından qıldırılğan bayram namazına toplaştı.
«Biz, musulmanlar, er kes içün insaf, sabır ve ikmet nümünesi olmaq kerekmiz. Qırımda yaşağan bütün milletlernen dostluq köpürlerini qurmaq kerekmiz. Esas vazifemiz, barışıq ve amanlıqtır, qadınlar ve balalar közyaş tökmesin, dava ve cenk olmasın», – dep ayttı Qırım müftisi.
Müftiniñ qayd etkenine köre, «musulmanlar el-elge olmalı, bir-birine destek köstermeli, birlik olmalı ve bir-birini ürmet etmeli». Bayram künleri o, yaqınlarğa ve soy-soplarğa diqqat etmege, muhtaclarğa yardım elini uzatmağa çağıra.
QMDİ matbuat hızmetiniñ bildirgenine köre, Qırım camilerinde biñlerce musulmanlar Oraza bayramı namazını qıldı. Elde etilgen malümatqa binaen, üç bayram künü devamında Qırımnıñ bütün rayonlarında tantanalı merasimler keçirilecek.
Rusiyege boysunğan işğal etilgen yarımadanıñ yolbaşçısı Sergey Aksönovnıñ qayd etkenine binaen, Qırımda «cemaatnıñ ahlâq qaideleriniñ qaviyleştirilmesi ve bütün konfessiyalar müminleriniñ birligine yol bergen unikal diniy adetler tiklenildi».
Qırım işğal etilgen soñ Qırım musulmanları diniy idaresi Rusiye qanunları boyunca Qırım ve Sevastopol şeeri musulmanları diniy idaresi olaraq qayd etildi. 2016 senesi yanvar ayında qırımtatar halqınıñ lideri Mustafa Cemilev Ukrainanıñ qıtaiy qısmında qırımtatar müftiyatınıñ teşkil etilmesi kerek olğanını ilân etti, çünki QMDİ Qırımnıñ rusiyeli ükümeti menfaatı boyunca faaliyet alıp bara.
İyül 5-te musulmanlar muqaddes Ramazan ayınıñ yekünlenmesini, Oraza bayramını qayd ete. Qırımtatar Milliy Meclisi reisi Refat Çubarov vatandaşlarnı bayramnen hayırladı ve Qırımnıñ işğalden azat etilmesi içün bütün ğayretler muvafaqiyetli olmasını tiledi. Rusiye tarafından işğal etilgen Qırımda bu bayram raatlıq künü olaraq ilân etilgen.
Ramazan (Ramadan) ayı bütün musulmanlar içün müim olğan bir aydır. Ramazan bitken soñ musulmanlar Oraza bayramını qayd ete.
Bu kün olar bayram namazını qıla, eñ güzel urba kiye, milliy aşlar pişire, bayram sofralarını donata, musafirlerni qarşılay ve musafirlikke ediyelernen bara, quvana ve şenleneler. Bayram üç kün devam ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
