Link açıqlığı

Rusiye prezidenti Vladimir Putin musulmanlarnı Ramazan ayınıñ yekünlengenini belgilegen Oraza bayramınen hayırladı, dep ilân ete Kreml matbuat hızmeti.

Putin hayırlav sözlerinde devlette camiler ve medreselerniñ qurulmasını, bunen beraber, musulman ümmetiniñ milletlerara munasebetlerge qoşqan issesini qayd etti.

«Bugün biz Rusiye musulman ümmetiniñ eksiksiz ayatınıñ şaatları olamız: camiler qurula, Bolğar islâm akademiyası tesis etildi, universitetler ve medreseler teşkil etile, islâm tasili ve musulmanlarnıñ acılıqqa barması zemaneviyleştirile. Mustaqil devletlerniñ işbirligi memleketleriniñ müftiyatları ve ecnebiy dindaşlarnen işbirlik keñleştirile», – dep aytıla beyanatta.

İyül 5-te musulmanlar muqaddes Ramazan ayınıñ yekünlenmesini, Oraza bayramını qayd ete. Qırımtatar Milliy Meclisi reisi Refat Çubarov vatandaşlarnı bayramnen hayırladı ve Qırımnıñ işğalden azat etilmesi içün bütün ğayretler muvafaqiyetli olmasını tiledi. Rusiye tarafından işğal etilgen Qırımda bu bayram raatlıq künü olaraq ilân etilgen.

Ramazan (Ramadan) ayı bütün musulmanlar içün müim olğan bir aydır. Ramazan bitken soñ musulmanlar Oraza bayramını qayd ete.

Bu kün olar bayram namazını qıla, eñ güzel urba kiye, milliy aşlar pişire, bayram sofralarını donata, musafirlerni qarşılay ve musafirlikke ediyelernen bara, quvana ve şenleneler. Bayram üç kün devam ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG