Link açıqlığı

Dünya musulmanları iyül 5-te mubarek Ramazan ayınıñ soñunı – Oraza bayramını qayd etmege başlaylar.

İnşallah, Qırımnıñ işğalden azat etilmesi ve onıñ Ukraina terkibine qaytarılması içün yapqan faaliyetimiz ve ğayretlerimiz Allahnıñ razılığını qazanır
Refat Çubarov

Qırımtatar Milliy Meclisi reisi Refat Çubarov semetdeşleriniñ bayramını hayırlap, Qırımnıñ işğalden azat etilmesi içün kösterilgen bütün ğayretler muvafaqiyetli olmasını tiledi.

«İnşallah, Qırımnıñ işğalden azat etilmesi ve onıñ Ukraina terkibine qaytarılması içün yapqan faaliyetimiz ve ğayretlerimiz Allahnıñ razılığını qazanır ve biz, qırımtatarlar, Ukraina musulman ümmetiniñ bir qısmı, evlerimizge qaytıp, Allah meramet etken Qırımda yaqınlarımızğa qavuşacaqmız», – dep yazdı Çubarov Facebook saifesinde.

Rusiye tarafından işğal etilgen Qırımda bu bayram raatlıq künü olaraq ilân etildi. Moskva tayinlegen Qırım yolbaşçısı Sergey Aksönov iyül 5-te «Raatlıq künü aqqında» buyruğını imzaladı.

2016 senesi iyün ayınıñ ortasında Qırım ve Aqyar meseleleri Ukraina Devlet hızmeti Oraza ve Qurban musulman bayramları olğan künleri devlet seviyesinde raatlıq kününi ilân etmek teşebbüsini bildirgen edi.

Ramazan (Ramadan) ayı bütün musulmanlar içün müim olğan bir aydır. Ramazan bitken soñ musulmanlar Oraza bayramını qayd ete. Bu kün olar bayram namazını qıla, eñ güzel urba kiye, milliy aşlar pişire, bayram sofralarını donata, musafirlerni qarşılay ve musafirlikke ediyelernen bara, quvana ve şeñleneler.

Bayram üç kün devam ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG