Link açıqlığı

Saatnıñ esas haberi

Kyiv hatırlata: Qırımğa ecnebiy ziyaretler – Ukraina tarafından uyğunlaştırılmalı


Ukraina Tışqı işler nazirliginde hatırlatalar: Qırım Muhtar Cumhuriyeti territoriyasına ecnebiylerniñ bütün ziyaretleri ukrain qanunlarına köre yapılmaq kerek. Bu aqta ukrain tışqı siyaset müessisesiniñ matbuat kâtibi Maryana Betsa Twitterde yazdı.

«Hatırlatma: Qırımğa bütün halqara ziyaretlerniñ qanun boyunca yapılması kerek», – dep yazdı o.

Keçken afta bildirilgen malümatqa binaen, İsrail vatandaşları, eki büyük kişi ve üç bala Qırım yarımadasına kelgen soñ yaqınlarınen bağğa çıqmadı. Rusiye tarafından işğal etilgen Qırımnıñ ameldeki ükümet İsrail vatandaşlarını tapmaq içün 700-den ziyade uquq qoruyıcını çalıştırdı. Rusiye İçki işler nazirliginiñ Qırım idaresiniñ matbuat hızmetinde qayd etkenlerine köre, Qırımğa kelgen ecnebiyler İsraildeki soy-soplarına telefon açıp olamadı.

Ukraina Devlet sıñır hızmetinde bundan evel bildirdiler ki, ecnebiyler işğal etilgen Qırımnı ziyaret etüv qaidelerini daa ziyade bozmağa başladı. Müessisede ilân etkenlerine binaen, qayd etilgen qaidelerniñ bozulması cinaiy ve memuriy mesuliyetke ketire bile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG