OSCE Parlament assambleyası sessiyasında iştirak etken Rusiye eyyeti Qırım, Abhaziya ve Cenübiy Osetiya boyunca rezolütsiyalarnı muzakere etmege red etti. Bu aqta malümatnı Radio Svoboda mühbiri bildire.
Tbiliside bulunğan Rusiye Federatsiyasınıñ eyyeti toplaşuvnı, iştirakçilerni Qırım boyunca rezolütsiyanı qabul etmekten vazgeçmege inandırıp olmağan soñ, terk etti. Vesiqa Ukraina temsilcileri tarafından Gürcistan paytahtında keçirilgen OSCE Parlament assambleyasınıñ 25-ci sessiyası çerçivesinde azırlanıldı.
Rusiyeli deputatlarnıñ demarşına baqmadan, vesiqa leyhası Parlament assambleyasınıñ umumiy toplaşuvınıñ muzakerelerine kirsetilgen.
Rusiye eyyeti yolbaşçısı, Devlet Duması deputatı Nikolay Kovalöv Qırım boyunca leyhanı «maqbul etilmeycek leyha» dep adlandırdı. Kovalövnıñ qayd etkenine köre, Abhaziya ve Cenübiy Osetiyadaki vaziyet, onıñ fikrince, «Rusiyege qarşı ve siyasiy» ola. Bunıñ içün rusiyeli deputatlarnıñ bu vesiqanıñ muzakere etilmesinde iştirak etmege niyetleri yoq.
Qırım boyunca rezolütsiyada Qırımnıñ Rusiye tarafından işğal etilmesi takbih etile. Ukrain temsilcileri tarafından OSCE Parlament assambleyasınıñ baqıluvına kirsetilgen rezolütsiya «Qırımda insan aqları ve esas serbestliklerniñ bozuluvı, qırımtatar ealiniñ aqları bozulması aqqında» adını taşıy.
OSCE Parlament assambleyası, Avropada havfsızlıq ve işbirlik boyunca teşkilâtnıñ terkibine kirgen Avropa, Asiya ve Şimaliy Amerikanıñ 57 devletini birleştirgen parlamentlerara teşkilât ola.
