Turistik yollamalar yañıdan satılıp başlağan soñ üç kün devamında Türkiye rusiyeliler arasında eñ populâr yöneliş oldı. Bu aqta bazarertesi künü «Kommersant» yaza.
Neşirniñ malümatına köre, satılğan turlarnıñ 35 fayızı iyül 1-den Rusiye vatandaşları içün yañıdan açılğan Türkiye kurortları ola.
İyül 2-de Rusiye turistik operatorları assotsiatsiyasınıñ icra müdiri Mayya Lomidzeniñ «RİA Novosti» agentligine bildirgenine binaen, Türkiyege putövkalarnıñ istenilmesi kerçek tekliflerge köre on qat ziyadedir. Bunen beraber, onıñ sözlerine köre, turlarnı çoq insan almay, esasen, bu muntazam ava taşimasınen turistik paketleriniñ yüksek fiyatlarınen bağlı.
Turoperatorlarnıñ ilân etkenlerine köre, olar çarter programmasını yañıdan teşkil etmege azır, amma bu tek Rusiye aviatsiyasınıñ resmiy qararından soñ mümkün olacaq.
Rusiye ve Türkiye prezidentleri Vladimir Putin ve Recep Tayip Erdoğan iyün 29-da telefon lafı çerçivesinde turizm saasında işbirlik yañıdan tiklemesi ve ticariy-iqtisadiy munasebetlerniñ eyileştirilmesi başlaması aqqında añlaştılar.
Kremlniñ qayd etkenine köre, bu, Erdoğan 2015 senesi noyabr ayında elâk olğan uçucınıñ qorantasından afu sorağanı ve taziye bildirgeninden soñ mümkün oldı. O vaqıt Türkiye arbiy ava quvetleri Türkiye ve Süriye arasındaki sıñır yanında rusiyeli Su-24 cenk uçağını urdı. Bundan soñ Moskva Ankarağa qarşı sanktsiyalar kirsetti.
