İyül 3-te OSCE Parlament assambleyasınıñ daimiy komiteti işğal etilgen Qırımdaki vaziyet boyunca ukrain rezolütsiya leyhasını baqıluvğa qabul etti. Rusiyeli agentliklerniñ malümatına köre, bu aqta Parlament assambleyasında Rusiye eyyetiniñ yolbaşçısı, Devlet Duması deputatı Nikolay Kovalöv bildirdi.
Onıñ sözlerine köre, rusiyeli eyyet bu vesiqağa deñişmeler kirsetilmesi boyunca muzakerelerde iştirak etmeycegini bildirdi.
«Biz sözde bulundıq, bu vesiqa asıl da obyektiv olmağanını, tendentsioz ve Rusiyege qarşı olğanını qayd ettik, bunıñ içün deñiştirmelerniñ kirsetilmesi kereksizdir», – dedi Kovalöv.
Rusiyede ve işğal etilgen Qırımda yasaq etilgen Qırımtatar Milliy Meclisiniñ reisi Refat Çubarov rusiyeli beyanatlarğa izaat berip, onıñ Tbilisige ziyareti neticeli olğanını qayd etti, o, bu ziyaret çerçivesinde Qırımda insan aqları ve qırımtatar halqınıñ işğal etilgen territoriyada vaziyeti aqqında malümatlarnı taqdim etti.
Ukrain temsilcileri tarafından OSCE Parlament assambleyasınıñ baqıluvına kirsetilgen rezolütsiya «Qırımda insan aqları ve esas serbestliklerniñ bozuluvı, qırımtatar ealiniñ aqları bozulması aqqında» adını taşıy.
OSCE Parlament assambleyasınıñ sessiyası iyül 1-den 5-ke qadar Tbiliside keçirile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
