Rusiyege boysunğan Qırım fevqulâde vaziyetler hızmetiniñ başı iyül 2-de Aqmescitke küçlü boranlı yağmurnıñ keleyatqanını bildire.
«Gidrometeorologiya ve etraftaki müit közetüvi idaresiniñ malümatına köre, Aqmescit şeerinde iyül 2-de kündüz bazı yerlerde küçlü sağanaq, boranlı yağmur ve burçaq yağacaq, yel süratı saniyede 20-25 metrni teşkil etecek», – dep aytıla hızmetniñ haberinde.
Aqmescit sakinlerinden havfsızlıq qaidelerine riayet etmege rica etile, pencerelerni sıqıp qapatmağa, büyük tereklerniñ yanında olmamağa, em de naqliyatnı qoymamağa tevsiye etile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
