Link açıqlığı

Saatnıñ esas haberi

Putin Finlândiya prezidentine «Qırımnıñ Rusiye ile yañıdan birleşmesi» aqqında ayttı


Vladimir Putin (soldan) ve Sauli Niinisto (sağdan) Naantali şeerinde, 2016 senesi iyül 1 künü
Vladimir Putin (soldan) ve Sauli Niinisto (sağdan) Naantali şeerinde, 2016 senesi iyül 1 künü

Rusiye prezidenti Vladimir Putin kene de 2014 yılında olğan Ukrainada «devlet avdarması» ve «halqara uquqnen tam uyğun olğan Qırımnıñ Rusiye ile yañıdan birleşmesi» aqqında ilânı ile çıqtı.

«Rusiye Ukrainada devlet avdarmasını tarik etmedi, Qırım yarımadada yaşağan insanlarnıñ ömrüni, sağlığını ve havfsızlığını telüke altına qoymadı... Qırımnıñ Rusiyenen yañıdan birleşmesi tamamınen qansız, atışsız, fedasız, halqara uquqnen tam uyğun olıp, yarımadada yaşağan insanlarnıñ istekleriniñ temelinde keçti», – dep ilân etti o Finlândiya ziyareti vaqtında.

Onıñ sözlerine köre, «Ukrainada devlet avdarmasına» qoltutqanlar böyle «tamamen tarikli areketni» yapqanlar, şimdi başqa adımlarnı da atalar, şu cümleden «Avropanıñ başqa regionlarında, em de Baltik deñiziniñ regionı, kerginlikni quvetleştireler».

Putin Finlândiya Şimaliy Atlantik Añlaşması Teşkilatına (NATO) kirse, çekilgen rus ordusını sıñırğa qaytarmaqnen qorquta.

Finlândiya prezidenti Sauli Niinistö Naantali şeerinde Rusiye reberini qarşıladı, anda ise Putin içün narazılıq numayışı keçirildi. Onı Puxit adında faalleriniñ internet-birleşmesi «Svobodnaya Rossiya» teşkil etti.

Vladimir Putin ve Kreml faalleri Kyivde 2014 yılınıñ başında olğan «devlet avdarması» ve «akimiyetniñ uquqsız qudretli deñiştirüvi» aqqında çoq aytqan ediler.

Olar o zamanki prezident Viktor Yanukoviç Ukrainadan qaçıp anayasağa uymağan areket yapqanını aytalar. O vaqıt qanuniy saylanğan Ukraina parlamenti Yanukoviç «anayasağa uymağan bir usulnen anayasada yazılğan vekâletlerni yapmaqtan özü vazgeçti ve vazifesini becermey» dep belgiledi ve nevbetten tış prezident saylavları tayinledi.

Finlândiya öz vaqtında Sovetler Birliginiñ basqısı sebebinden bloklardan tış statusnı almaq kerekedi ve alâ daa oña riayet ete. Aynı zamanda Helsinki NATO birliginen sıq işbirligi yapa, bu işbirligini ve öz askerleriniñ Şimaliy Atlantik Añlaşması Teşkilatı ile birleşken arbiy oquvnu da devam etecekni bildirdi. O, NATO kirmegemi-yoqmı özü qarar berecek. Kelecek afta Polonyadaki Varşavada olacaq NATO sammitine Sauli Niinistö de davetli.

XS
SM
MD
LG