Link açıqlığı

Lavrov: Moskva ve Ankara Suriye mevzusında bir qararğa keldiler


Rusiye tış işler naziri Sergey Lavrov ve Türkiye tış işler naziri Mevlüd Çavuşoğlu

Rusiye tış işler naziri Sergey Lavrov Türkiye zenaatdaşı ile eki taraflı munasebetlerniñ eyilişmesi vaqtında körüşti. Lavrov Rusiyeniñ Soçi şeerinde Mevlüd Çavuşoğlu ile muzakereler keçirdi.

Çavuşoğlu qayd etti ki, Türkiye ve Rusiye Suriyedeki buhrannı siyasiy yollar ile al etmek içün beraber çalışmalılar.

«RİA Novosti» haber agentliginiñ malümatına köre, Çavuşoğlu Türkiye «İslâm devletinen» küreşe, bu sebepten de terroristlerniñ nişanı oldı, dep ayttı.

İyün 28-de üç canlı bomba İstanbul ava limanında ücümni kerçekleştirdi, bunıñ neticesinde 43 insan can berdi, 200 kişi yaralandı.

Lavrov Moskva ve Ankara işbirligini yañıdan başlamağa añlaşqanlarını körüşüvden soñ aydınlattı.

Kremlniñ malümatına köre, Türkiye prezidenti Recep Tayyip Erdoğan Rusiye prezidenti Vladimir Pütinge mektüp yazıp afu soradı. Faqat Ankara Erdoğan Rusiye uçucısınıñ ölüminen bağlı taziyelerini qorantasına bildirgenini ve bu uçaq tüşürilgeninden afu istey manasına kelmegenini bildire.

Bundan soñ Pütin ve Erdoğannıñ birinci telefon subeti olıp keçti.

Keçken sene noyabr 24-de Türkiye-Suriye sıñırında Rusiye Su-24 cenk uçağı tüşürilgen soñ Rusiye ve Türkiye arasında munasebetler yaramay oldı. Ankara uçaq memleketniñ ava boşluğını bozdı, dep bildire, Moskva ise bunı inkâr ete. Rusiye Türkiyege qarşı ceza kirsetken edi.


XS
SM
MD
LG